ھەسرىتىم

ھەسرىتىم

ئابدۇلئەھەدخان مەخسۇم ھاجىمنىڭ 1983- يىللىرى تۈركىيەدىن ۋەتەنگە قايتىش ھارپىسىدا يازغان شېئىرى

 

ھۆر ۋەتەن تۈركىيەدىن ئايرىلمىقىم ھەسرىتىم،
گەر قىزىللار زۇلۇم قىلسا باشتا باردۇر كۈلپىتىم.

ۋالىدەم، ئەۋلادى قارداش ناتىۋانلار بولمىسا،
قايتماس ئەردىم ھۆر ۋەتەندىن تاپىلۇردى ئۈلپىتىم.

ئانا يۇرتۇم قالدى زۇلمەت ئاسارەتنىڭ ئاستىدا،
مىللىتىمنىڭ خورلىقىغا ئەسلىي يوقتۇر تاقىتىم.

ئانىسىز بىچارە مىللەت ئىلىمدىن بەكمۇ يىراق،
چاھارپايدەك زۇلۇم تارتار ھەر كۈنى نەچچە قېتىم.

گەرچە مەن چىن دۈشمىنى رەھمەيلىمەس چىنلەر ماڭا،
مىللىتىمدىن ئايرىلىپ قىلچە كۆرۈنمەس راھىتىم.

ھەر كۈنى تەھدىت ئىچىدە ئۆتسىمۇ كۈنلەر ماڭا،
مىللىتىمگە بىر ئېغىز ئىلىم ئۆگەتمەك تائىتىم.

مىللىتىمدىن بىرسىگە گەر ئاڭلىتالىسام تارىخ،
دوستنى دوست، دۈشمەننى دۈشمەن تونىسا سائادىتىم.

مىللىتىمنىڭ باللىرى دىن-مىللىتىنى تونىماي،
دۈشمىنىچۈن ئىشلىسە دائىم بولۇر بۇ زىللىتىم.

شۇنىڭ ئۈچۈن ئوتقا كىرگەندەك كىرىپ مىللەت ئارا،
بىر تىنىق دىنىمگە خىزمەت ئەيلىسەم يوق ھەسرىتىم.

قامىسا، ئۆلتۈرسە دۈشمەن مەنغىنە يالغۇز ئەمەس،
شۇھەدالەرگە قوشۇلسام، ھەل بولۇر چوڭ نىيىتىم.

مۇندا تۇرسام يۇرتۇم ئۈچۈن نى قىلارمەن بىلمىدىم،
يالغۇز ئاتنىڭ چېڭى چىقماس دەپتىكەن ئۇ مىللىتىم.

سودىگەرلەر پۇل ئىلە بىرمۇنچىلەر تۇرمۇش ئىلە،
بۇ مۇساپىرلەر تارالمىش ھەر بىرى گويا يېتىم.

بولمىسا بىرلىك سېپى ئاۋارە بولسا نەفىس ئىلە،
مىللىتىمنىڭ خورلۇقى قالغاي زامانلار شۇ پېتىم.

مۆھتىرەم تۇغقانلىرىم، ئاكىلىرى، ئۇستازلىرىم،
ئىتتىپاق بولساڭلا شايەد خۇش بولۇردى بۇ يېتىم.

ئىتتىپاقسىز ھۆررىيەت ھاسىل قىلالىغان قايسى ئەل،
ئىككى يىپ بىرلەشسە كۈچ ھاسىل قىلۇر يەنە بىر قېتىم.

ئىلىملىكلەر دەۋەت ئەتسە ئىشلىمەككە بارچىنى،
قىلسىلەر دەۋا شىكايەت، نە ئولۇردى كۆپ قېتىم.

تۈركىيە، مەككە ۋە سائى ئەھلى ھىجرەت بىرلىشىپ،
قىلسىلەر دۇنياغا دەۋا خۇش بولۇردى ھەزرىتىم.

قىلدىلەر كۆپ سەئيىلەر قالماق ئۈچۈن دالاي لاما،
تاشلىماي كىشىنى يالغۇز دەستەك ئولسۇن مىللىتىم.

ئاكىلار ئۇكاسىنى، ئەرلەر ئايالنى باشقۇرۇپ،
ۋەزنىسىز گەپلەرگە باقماي بىرلىشىشتە ئىززىتىم.

سۆز بىلەن يازماق بىلەن تارىخىنى ئاڭلاتماق بىلەن،
ھۆر جاھاندا سەئيى قىلساق بىر كېلۇر چوڭ پۇرسىتىم.

بىر كىشىنىڭ كۈنىگە بىر ئىككى نان بەلكى يېتەر،
ئاللۇ-پۇللۇ ئەيشۇ نەفس قۇربانى بولماق ھەسرىتىم.

يازغا قىش، كۈندۈزگە شەب، دۇنياغا ئۇخرا جەزمى بار،
مەڭگۈ بولماس راھىتى دۇنيا چېلىش تاپ جەننىتىم.

ھېچنېمە ئۆزىچە بار بولماس ياراتقان تەڭرى بار،
نە ئۈچۈن ياراتتى باق سورماسمۇ رەببۇلئىززىتىم.

بويسۇنۇپ ئاللاھقا ھەمدە ئول ئۈچۈن قىلغان كۈرەش،
ئىككى ئالەمدە ئەزىز بولماسمۇ ئويلا ئۈممىتىم.

 

 

مەنبە: ئابدۇقاھار مەھزۇن

ئابدۇلئەھەد مەخسۇم داموللام فەيىسبۇك مەخسۇس سەھىپىسى

https://www.facebook.com/ئابدۇلئەھەد-مەخسۇم-ھاجىمالشيخ-عبد-الاحد-مخدوم-1044734569024503/?__tn__=kCH-R&eid=ARAnOE_VFoiNqGXk4E-G_7LLAIiqUXt_QrR0r6xOsTdfCkOhDPRhEF8YpvtkYgmRvySG3jsocAiS8FOT&hc_ref=ARRyjmVG1VdocaMctRFpk3c_RKcUcS-x6Uv2Jnjsk2L4i_hhNbrrrLE7JhL95TlLcqU&fref=nf&__xts__[0]=68.ARDn7I0fWCQ2qlRJlXTvZXuaI-AmzXr2ovtC4LzJByeobij20c9Pif-FJIKKGNev0AZPLYSYqMy2xYxkk7ZNcWRfH_Ut8_nmUhN9Yo-6uHYRbSZOBnZjcG200gX09TV_mcmEKg1RrK2W7uWUtNlaCQ_hOoOwfbkexAwwuOeE6EHdMluvQEBl8-IoRuN56qCHEALAYvQO-z8S3Nr6pGzQNhrILWp7lfJ3Z0Ak8IIZQd-0-jkr00KB-3kwMeqdb6hn8G1H4UXPDD6pWjztaKhWn6kUCyUXjE6vzpIi6hE0HqbtLeaZM5sFEuGFxhSsbJuaNliMufj2UFvNmLIr9Cy9o4g