كىشىلىك ھوقۇق تەشكىلاتلىرى ب د ت نى شەرقى تۈركىستاندىكى كىشىلىك ھوقۇق كىرزىسىغا قارىتا ھەرىكەت قوللىنىشقا مۇراجىئەت قىلدى

ئۇيغۇر ئاگېنتلىقى، 14- مارت

ئامېرىكا ئاۋازى خىتايچە تورىنىڭ 14-مارت خەۋىرىگە كۆرە، ھۆكۈمەتسىز تەشكىلاتلاردىن «كىشىلىك ھوقۇقنى كۆزىتىش تەشكىلاتى» ۋە خەلقئارا كىشىلىك ھوقۇق مۇلازىمىتى» (International Service for Human Rights) 3-ئاينىڭ 14-كۈنى بىلدۈرۈشىچە، ب د ت نىڭ كىشىلىك ھوقۇق كومىتىتى شەرقى تۈركىستاندىكى «كۈنسېرى ئېغىرلىشىۋاتقان كىشىلىك ھوقۇق كىرزىسىنى» ئالدىن ئورۇنغا قۇيۇپ ھەل قىلىشى، شەرقى تۈركىستاندا مۇستەقىل تەكشۈرۈش ئېلىپ بېرىشى، ھەمدە خىتاينىڭ جاۋابكارلىقىنى سۈرۈشتە قىلىشى كېرەك ئىكەن. 

«كىشىلىك ھوقۇقنى كۆزىتىش تەشكىلاتى» نىڭ جەنۋەدىكى ئىش بىجىرىش ئورنىنىڭ مودىرى جون فىشېر (John Fisher) مۇنداق دېدى:« ب د ت كشىىلىك ھوقۇق ئورگىنىنىڭ شىنجاڭغا (ش ت) ئەركىن كىرىپ چىقىش مۇراجىئەتلىرىگە قارىتا، خىتاي نەچچە ھەسسە ئىنكار قىلىش ۋە ساختا ھىكايىلەر بىلەن ئىنكاس قايتۇرىۋاتىدۇ، شۇنىڭ بىلەن بىرگە ھەر قايسى دۆلەتلەرنى بۇ رايۇندىكى مۇسۇلمانلار باشتىن كەچۈرىۋاتقان كىشىلىك ھوقۇق قاباھەتلىرىنى ئەيىبلىمەسلىك ئۈچۈن بېسىم قىلىۋاتىدۇ»، «كىشىلىك ھوقۇق كومىتىتىغا ئەزا دۆلەتلەر بىرلىكتە نارازىلىق بىلدۈرۈشى، ھەمدە مۇستەقىل تەكشۈرۈشتە چىڭ تۇرۇشى كېرەك.»

«كىشىلىك ھوقۇقنى كۆزىتىش تەشكىلاتى» نىڭ بىلدۈرۈشىچە، ۋەقەنىڭ يېقىنقى تەرەققىياتىنى كۆزدە تۇتقاندا، ب د ت ئوچۇق مۇراجىئەت ئېلان قىلىپ، «شىنجاڭ (ش ت) ۋەزىيىتىگە ئالاقىدار ئوبىكتىپ، مۇستەقىل ۋە كەسپىي ئۇچۇرلارنىڭ تەمىنلىنىشىنى تەلەپ قىلىش كېرەك» ئىكەن. ھەر قايسى دۆلەتلەرمۇ خىتاينى ئاز سانلىق مۇسۇلمان جامائىتىگە قاراتقان بارلىق زىيانكەشلىك سىياسەتلىرىنى توختىتىشقا دەۋەت قىلىشى كېرەك بولۇپ، بۇ سىياسەتلەر ئائىلەرنى پارچىلاش، مەدەنىيەت مىراسلىرىغا بۇزغۇنچىلىق قىلىش ۋە يوقىرى تېخنىكا بىلەن ئىز قوغلاش، دۆلەت ئىچى – سىرتىدىكى ئاز سانلىق مۇسۇلمانلارنى نازارەت قىلىش ۋە قورقۇتۇش قاتارلىقلارنى ئۆز ئىچىگە ئالىدىكەن. 

مەنبە: ئامېرىكا ئاۋازى خىتايچە تورى

جاۋاب يېزىش

ئېلېكتىرونلۇق خەت ئادرېسىڭىز ئاشكارىلانمايدۇ. * بەلگىسى بارلارنى چوقۇم تولدۇرۇسىز