ئىران تاشقى ئىشلار ۋەزىرىنىڭ سابىق مۇشاۋۇرى كورۇنا ۋىرۇسى تۈپەيلى ئۆلۈپ كەتتى

،

ئۇيغۇر ئاگىنتلىقى

سايرام ئوغلانى

2020.3.5

شۇ جاي ۋاختى پەيشەنبە كەچ ئىران تاراتقۇلىرى ئاشكارىلىغان خەۋەردە ، ئىران تاشقى ئىشلار ۋەزىرى جاۋاد زەرىفنىڭ سابىق مۇشاۋۇرى شەيخۇل ئىسلام ھۈسەيىن كورۇنا ۋىرۇسى بىلەن يۇقۇملىنىپ ئۆلۈپ كەتكەن .

ھۈسەيىن 1952 – يىلى ئىسپاھاندا تۇغۇلغان كۆزگە كۆرۈنگەن داڭلىق سىياسىيون بولۇپ ، ئىلگىرى ئىران ئىسلام پارلامېنتىنىڭ ئەزاسى بولغاندىن باشقا يەنە ئىراننىڭ سۈرىيەدىكى باش ئەلچىسى بولغان . ئۇندىن باشقا ئۇ جاۋاد زەرىفنىڭ مۇشاۋۇرى بولغاندىن سىرت ، يېقىنقى مەزگىلگىچە خەلقئارالىق ئىسلام مەزھەپلىرىنى يېقىنلاشتۇرۇش ھەيئىتىنىڭ مۇئاۋىن رەئىسلىك ۋەزىپىسىنى ئۆتىگەن .

تىلغا ئېلىشقا تېگىشلىك يېرى شۇكى ، ھۈسەيىن 1979 – يىلى تېھراندىكى ئامېرىكا باش ئەلچىخانىسىغا بۆسۈپ كىرىپ ، نۇرغۇن ئامېرىكا پۇقراسىنى تۇتقۇن قىلىۋالغان ئاۋانگارت ئوقۇغۇچىلارنىڭ بىرى ئىكەن .

بۇ مۇناسىۋەت بىلەن ئىران سەھىيە تەرەپنىڭ تەشۋىقات مۇدىرى كىيانۇش جاھانپۇر ، كورۇنا ۋىرۇسى بىلەن ئۆلۈپ كەتكەنلەرنىڭ سانىنىڭ 107 كىشىگە ، يۇقۇملانغۇچىلارنىڭ 3513 كىشىگە ، ياخشىلىنىشقا قاراپ ماڭغانلارنىڭ 739 كىشىگە يەتكەنلىكىنى ئېلان قىلغان.

جاھانپۇر يەنە ، يېقىنقى 24 سائەت ئىچىدىلا يېڭى بايقالغان بىمارلارنىڭ 591 كىشىگە يەتكەنلىكىنى ئالاھىدە تىلغا ئالغان . ئۇندىن سىرت ئۇ ھازىرغىچە كورۇنا ۋىرۇسىنى بايقاش ئۈچۈن تېزدىن تەييارلاپ چىققان ئورۇننىڭ 25 ئورۇنغا يەتكەنلىكىنى ، ئىران خەلقىنىڭ ئىمكان بار ئۆيىدە ئولتۇرۇپ ، كېسەلنىڭ يەنىمۇ يامراپ كەتمەسلىكى ئۈچۈن كۈچ چىقىرىشقا چاقىرغان.

مەنبە : RT ( رۇسىيە دۆلەت تاراتقۇسى )+ ئىران تاراتقۇسى .